BLOG DA MESA DAS VERBAS

Estamos de noraboa, xa que estreamos blog na Mesa das Verbas, deseñado e mantido pola nosa querida amiga e compañeira Andrea Fernández Maneiro "Nei". Así que podemos facilitarlle contidos relacionados coa Mesa das Verbas.

Deste xeito temos un arquivo da historia e das actividades da Mesa das Verbas.

Lembrar que a edición XCVI Mesa das Verbas terá lugar o último sábado de setembro, día 28, na Sala de Conferencias do Auditorio Municipal de Vilagarcía de Arousa.

E aí vai o vínculo con blog da Mesa das Verbas

https://uranialacelestiale.wixsite.com/mesadasverbas

REPORTS GRAPHIC OF THE PRESENTATION OF ANACO I

O pasado venres, 25 de xaneiro tivemos un agradable acto de presentación da revista poética da Mesa das Verbas, ANACO I. Ofrecemos algunhas imaxes de Tere Briones de dito evento.

 

Os medios de comunicación fixéronse amplamente eco do evento, como mostra, esta reseña do Faro de Vigo-Arousa, 26/01/2019:

PRESENTATION OF THE POETRY MAGAZINE: ANACO NÚM. 1

PRESENTACIÓN DA REVISTA POÉTICA DA MESA DAS VERBAS: ANACO Nº 1

25/01/2019   21:00

SALÓN GARCÍA

RÚA ALCALDE REY DAVIÑA

VILAGARCÍA DE AROUSA

Grazas a todos os que fixeron posible este nacemento, que nos enche de ledicia

A PLEASANT EXPERIENCE IN ARMENTEIRA: EDICIÓN ESPECIAL DA MESA DAS VERBAS - SAN ERO

IMAXE DE IÑAKI ABELLA

FARO DE VIGO - AROUSA

O primeiro sábado deste decembro (01/12/2018), xuntámonos sobre vintecinco amigos da Mesa das Verbas para celebrar unha edición especial que chamamos SAN ERO, facendo realidade unha idea do noso compañeiro e amigo Xosé Ramón Quintáns Suárez. A experiencia foi, recollendo o sentir dos participantes, extraordinaria e que deixou un bo sabor de espírito e de boca. Que eu me lembre, e como moi ben recollía na súa edición de Arousa o Faro de Vigo (02/12/2018), é a primeira vez, despois de case sete anos (que cumpriremos o 21 de xaneiro de 2019), que a Mesa das Verbas celebra unha edición fóra do Concello de Vilagarcía, a pesares de recibires invitacións para celebrar sesións noutros concellos. O programa foi o seguinte:

12:30 h. - Visita guiada ao Mosteiro de Santa María da Armenteira polo noso compañeiro e amigo Augusto Guedes (historiador), quen previamente nos enviou un fermoso e interesante traballo del sobre dito mosteiro nunha presentación en formato pdf.

13:30 h. - Recital poético no Claustro do Mosteiro.

14:30 h. - 16 amigos e compañeiros celebramos unha comida de confraternidade con brindes poéticos, poemas e cancións no bar A FONTE, onde fomos moi ben servidos e atendidos.

18:00 h. - Recital poético na Casa da Cultura da Armenteira, coa colaboración, que agradecemos, do Concello de Meis.

Despois de tan grata e gozosa xornada, xurdiron xa moitas novas iniciativas, ás que intentaremos dar forma. Sempre nos quedará a Armenteira.

O PROFESOR AUGUSTO GUEDES

EN PLENA EXPLICACIÓN

DETALLE DA IGREXA DE SANTA MARÍA DA ARMENTEIRA

BRUMBÉCK EN ACCIÓN

TIZADO NON DURME 

ESTÁ EXTAXIADO COMO O MONXE
A ESCOITAR A PASSARINHA

AÍNDA CANTA A PASSARINHA

Na ponla unha passarinha

aínda di o seu doce cantar,

segue o monxe a pasar;

súa sombra egrexia camiña,

percorre toda a campiña

deste Salnés, preto do mar.

Párome ledo a escoitar

os belos sons desta terriña.

O mosteiro da Armenteira

debido ao paxaro e ao monxiño

ten fama pola Terra enteira.

Non quero deixar o camiño

nin deixar de estar á beira

do lugar sacro do seu niño.

XERMÁN MANUEL TORRES

NO EIDO DAS LEMBRANZAS: TITO PORTO

 

As imaxes son de Andrea Fernández, tomadas na Mesa das Verbas, 04/08/2018   18:00

TITO PORTO MARCHOU XOGAR COAS ESTRELAS E COS COMETAS

Tito Porto, un querido amigo de todos pola súa afabilidade e pola súa actitude tan vitalista, era unha persoa boa, “no bo sentido da palabra boa”. Estaba cheo de ilusións e posuía unha grande creatividade. A súa mente era moza; pero, ao seu corpo empezáronlle a pesar os seus 97 anos e comezou a perder folgos e a sentirse canso. El presentía que a morte estaba preto, el mesmo o recoñecía e poñíase moi triste; porque el quería ser un neno. El sempre foi alegre e inquedo coma un meniño. Tíñalle tanto aprecio e respecto á infancia que sentía pesar por non ter tido un neto. El gozaba cos nenos e os nenos gozaban con el, no meu colexio tivemos a sorte de poder desfrutar do Tito neno entre nenos, xogando a compoñer versos e esculpir soños como un canto á vida, el que tivo unha vida plena e gozou do agarimo dos seus, súa amada esposa Olga e os seus queridos fillos e tivo o cariño e o respecto de todos cantos o coñecían. Sentiremos a súa ausencia os seus amigos da Mesa das Verbas e os seus compañeiros da partida diaria no Liceo Casino, institución tan querida e lembrada.

Agora recuperará a súa leda infancia e estará na compaña dos seus amados e venerados pais e dos seus queridos irmáns.

No alén, Tito seguirá a amar á súa querida Vilagarcía, cos Campos Elíseos onde naceu, os seus xogos e falcatruadas de nenos na súa praza de España, agora volverá a escoitar a campá desta súa igrexa parroquial, onde afondou a súa fe e a súa faceta de boa persoa. E teralle medo ás tronadas e aos ratos do faiado da súa casa e tratará de enganar unha vez máis ás súas irmás, que tanto o mimaban como o irmán pequeno.

E seguirá a compor os versos máis alegres e nostálxicos. Botaremos de menos a súa presencia na Mesa das Verbas, das que era o decano e nas que tanto desfrutou, salvo moi raras excepcións non faltou nunca aos recitais mensuais, que vimos celebrando desde xaneiro de 2011, neste próximo, o sábado que vén renderémoslle outro homenaxe, como o que lle ofrecimos cando cumpriu os seus 95 anos.

Tito, segue a xogar cos anxiños, compoñendo versos, pintando e esculpindo soños cheos de esperanza, volve a ser neno, para sempre neno e vela por todos nós, ti que xa estás na alegre e eterna casa do Pai, descansa en paz querido e inesquecible amigo, co teu sorriso sempre permanecerás nos nosos corazóns.

                 Teu amigo, Xermán Manuel Torres

 

A prensa local tamén se fixo eco do pasamento do noso querido amigo, Faro de Vigo-Arousa, La Voz de Galicia-Arousa, nas súas edicións en formato papel e formato dixital. E o Diario de Arousa en papel.

https://www.farodevigo.es/portada-arousa/2018/09/19/artista-vilagarcian-marchou-xogar-coas/1964170.html

https://www.lavozdegalicia.es/noticia/arousa/vilagarcia-de-arousa/2018/09/19/autodidacta-aguardo-jubilacion-sacar-arte-escena/0003_201809A19C2992.htm

Tamén nos medios dixitais e blogueros, recolleron a triste nova:

O Faiado da Memoria:

http://www.blogoteca.com/ofaiadodamemoria/

ASÍ RETRATOUME ESTANGA

Os parladoiros do xoves da Mesa das Verbas dan para moito, alí falamos de todo, do divino, do humano e aínda máis. De cando en vez algún, da a coñecer seus últimos poemas, comentamos sobre libros, preceptiva literaria...

E ultimamente, xuntouse ao faladoiro o pintor Estanga, que máis que falar; fai o que sabe, debuxar e fixo xa os retratos de moitos dos contertulios. Mentras dialogamos, el vai facendo seus retratos.

Pois ben, na xuntanza do xoves, 23 de agosto, ás 18:00 h. n'A Marina, Estanga púxose a debuxar como me vía e sobre as 19:15 h. rematou ese retrato co que principia esta entrada.

Os que participamos na idea da Mesa das Verbas queremos achegar a arte á xente, principalmente poesía, música, debuxo e pintura e queremos que cada un descubra o artista que leva dentro. A cultura é de todos, a cultura é do pobo; o pobo é cultura.

Estamos a argallar unha nova, sobre todo por iniciativa e coa axuda do amigo e compañeiro Xosé Ramón Quintáns, a ver se logramos o domingo, 9 de setembro, aproveitando a marea viva, facer unha visita a pé á Illa de Cortegada, onde desenvolveriamos unha xornada de convivencia poética durante doce horas, faremos recitais poéticos, cantaremos, percorridos polas zonas autorizadas, xantaremos xuntos, os máis atrevidos poderán tomar un baño e moitas cousas máis. A saída polo Carril, ás 10:00 h. e o regreso ao continente sobre as 21:00 h.

Estamos a xestionar os permisos co Concello, Illas Atlánticas e solicitando a colaboración de Protección Civil de Vilagarcía de Arousa e contaremos co asesoramento de Xosé Ramón Quintáns, quen poñerá a disposición do acto a súa embarcación.

Pensamos e queremos que sexa un acto interesante, agradable para gozar da poesía da exhuberante Natureza da nosa Ría de Arousa e da poética e histórica Illa de Cortegada, pertencente ao Parque Natural das Illas Atlánticas.

Todos os actos da Mesa das Verbas son abertos, pode participar quen así o desexe. Para a xornada de convivencia poética en Cortegada hai de prazo para inscribirse ata o 1 de setembro, facilitando á organización: nome e apelidos, nº de NIF.

O acto suspenderase se non é autorizado polas autoridades competentes e tamén no caso de mal tempo. 

Meu segundo premio no I Concurso Literario Letras Galegas

Nese mencionado Concurso, organizado polo Centro Comercial Arousa e a Mesa das Verbas, o traballo que ofrezo nesta entrada levou o 2º premio:

BUCLE NO LABIRINTO

Sentados na ponte pequena, preto da fermosa fervenza e dos antigos muíños, mollando os nosos pes no río saudoso, que se perde nas brétemas do espazo e do tempo... eu co avó a soñar coas estrelas e cos mundos ignotos poboados de verbas e maxestosas bolboretas.

-        -   Avó colleranos aquí a noite?

-        - Ti es aurora; eu lusco e fusco, a noite moura virá.

-        -   E veremos o campo de estrelas que vai cara o norte?

-        -   Así será, ti verás durante lúas e lúas ese campo, eu axiña ficarei nel.

-        -   Nese campo haberá años e ovellas?

-        -   E haberá, irán pastar nas leiras de algodón que ti verás. Nos recunchos escuros estarei eu.

-        -   Non digas iso avó que me pos triste, poderei eu levarte a luz?

-        -   Ti es a luz, albíscase nos teus ollos.

-        -  E pasearemos ti e máis eu por alí?

-        -  Sempre que me nomees e me lembres eu estarei en ti.

-        - Entón, avó, sempre, sempre direi o teu nome, berrareilles aos ameneiros e aos bidueiros como te chamas, non si?

-         - E o murmurio das súas follas, levado polo vento xunguirán as nosas voces, eu desde alá.

-         -  Avó porque agora me sinto tan triste?

-        -  Cala, cala... non me fagas chorar e deitar as bágoas secas dos meus vellos ollos. Aquí, no río está o noso lugar por sempre. As ninfas ancho lembrar.

-        -  Avó dille ás ninfas que non se esquezan diso, por favor!

-        -   Cala, cala... que non o esquecerán...

                                                                                            ... ... ...

O avó colle da man ao seu netiño (e lémbrase da pasada e lonxana conversa co seu avó xa ido). Venus comezaba a despuntar no ceo e cara a estrela Polar o campo de estrelas comezaba a brillar... camiñaban de paseniño a carón do río, que deitaba mansamente as súas augas cara o mar, que estaba ao lonxe, ben lonxe... O neto a soñar co seu ledo parolar, o avó coa tristura nos seus ollos, en silencio, sabedor de que axiña deixarán de alumear. Pasa o río como a vida para as súas augas finar no mar e así a roda da vida, roda que roda sen parar.

                                                                               

                                Xermán Manuel Torres

I CONCURSO LITERARIO LETRAS GALEGAS - 18

Reunido o xurado o mércores, 18/04/2018    18:00 h, baixo a presidencia de Enrique Brumbéck e integrado ademais por Andrea Fernández, Ramón Torrado e Luís González, despois das súas deliberacións, emitiron o seguinte fallo:

1º PREMIO:   Cristian Díaz Araújo, por "Esquecinme"

2º PREMIO:   Xermán Manuel Torres, por "Bucle no labirinto"

3º PREMIO:   Augusto Guedes, por "Miño"

O xurado tamén decidiu establecer un accésit para Alejandro Guanella, por "Vibracións"

A entrega de premios terá lugar o xoves, 17 de maio de 2018, Día das Letras Galegas, ás 20:00 h. na sala de xuntanzas, no 3º andar do Centro Comercial Arousa de Vilagarcía, nunha edición especial, a LXXXII Mesa das Verbas.

Parabéns para os máis de 70 participantes e noraboa a todos os premiados.

MEDULIO - BOLETÍN NÚM 2 DA MESA DAS VERBAS

Hoxe imos incluir o Boletín da Mesa das Verbas núm. 2, está a piques xa de aparecer impreso o nº 7, que se poñerá á venda na próxima edición da Mesa, o vindeiro sábado, 28 de abril. Grazas á venda deste humilde boletín entre os asíduos da Mesa das Verbas puidemos recadar os cartos que reverten nos premios aos literatos que participen no I CONCURSO LITERARIO LETRAS GALEGAS, organizado entre o Centro Comercial Arousa e o colectivo da Mesa das Verbas. Tamén este boletín é un órgano de expresión libre para os participantes na experiencia da Mesa das Verbas, aos que desde aquí lle damos as gracias por manter viva a creación de versos e verbas, que ceibamos ao ar de Arousa.

I CONCURSO LITERARIO LETRAS GALEGAS

Imaxe de Noé Parga (Faro de Vigo)

Imaxe do Diario de Arousa

I CONCURSO LITERARIO LETRAS GALEGAS / 18

CONVOCADO E ORGANIZADO POLA MESA DAS VERBAS E O CENTRO COMERCIAL AROUSA

1.- Convócase este I CONCURSO LITERARIO LETRAS GALEGAS / 18, idea e organización da Mesa das Verbas e do Centro Comercial Arousa co fin de promover e promocionar a creación literaria en lingua galega.

2.- Poderá participar neste concurso calquera persoa que o desexe que necesariamente acepta as presentes bases, propostas polas entidades colaboradoras, así como tamén acepta todas as decisións do xurado (que será elixido e conformado no seu día e oportunamente) e que terá a capacidade de dirimir e interpretar todo o concernente a este concurso e as súas decisións serán inapelables.

3.- Cada persoa poderá presentar un máximo de tres obras, que poderán pertencer a calquera xénero e estilo literario. A obra terá que estar escrita en idioma galego, ser orixinal e inédita, de tema libre. Non podendo ser coñecida nin premiada en calquera outro certame.

4.- A extensión máxima de cada obra será dun folio por unha soa cara. No reverso do folio figurará un número de teléfono de contacto. O folio non poderá conter ningún sinal de identificación, tan só pola parte de atrás figurará o teléfono de contacto.

5.- O prazo de entrega será ata o 17/04/2018 (inclusive). As obras serán depositadas nas urnas que se colocarán ao efecto nas dependencias do Centro Comercial Arousa.

6.- Os premios non poderán declararse desertos.

7.- A entrega de premios terá lugar o xoves, 17 de maio de 2018, Día das Letras Galegas, nunha edición especial da Mesa das Verbas, a partires das 20:00 h. na sala de xuntanzas, no 3º andar do Centro Comercial Arousa de Vilagarcía de Arousa.

8.- Os premios serán os seguintes:

- 1º PREMIO: 90 €, un vale de compra do Centro Comercial Arousa por valor de 50 €, e diploma.

- 2º PREMIO: 40 €, un vale de compra do Centro Comercial Arousa por valor de 40 €, e diploma.

- 3º PREMIO: 30 €, un vale de compra do Centro Comercial Arousa por valor de 20 €, e diploma.

9.- Os autores ceden todos os seus dereitos sobre as obras, durante o prazo dun ano a partires da data da entrega de premios, por se as entidades convocantes tiveran a oportunidade da publicación das obras premiadas. Transcorrido ese ano, reverterían de novo nos seus autores.

10.- As obras non premiadas poderán retirarse ata o 17/06/2018, acreditando debidamente ser a autora ou autor, despois desa data serán destruídas.

11.- A participación neste concurso implica a total e plena aceptación destas bases.

Vilagarcía de Arousa, 17 de marzo de 2018

BOLETÍN DA MESA DAS VERBAS

TITO PORTO, UN EXEMPLO DE POETA VITAL

Tito Porto máis eu nun acto poético

Tito Porto vén de cumplir 96 anos o pasado 7 de xullo de 2017, día de San Fermín, é un exemplo de vitalidade e entusiasmo para todos nós. Cunhas ganas de vivir extraordinarias e tendo un enorme interese e curiosidade por todo; é exemplar. Desexamos para este querido amigo e compañeiro longa vida para poder gozar da súa presenza tan querida e buscada e para deleitarnos con moitos poemas seus, tan tenros e cheos de vida e de experiencias. É un dos históricos da experiencia poética arousá Mesa das Verbas, non se pode entender esta vivencia sen Tito. Vida e poesía para Tito e para a Mesa das Verbas. Con moito agarimo, parabéns!

E agora un fermoso e sentido poema de Tito Porto: