sábado, 7 de julio de 2018

BOLETÍN - NÚM 3 - MESA DAS VERBAS










Seguimos a colgar o boletín da Mesa das Verbas, Medulio, o presente correspóndese co nº 3. Na LXXXIV MESA DAS VERBAS - POESÍA NA RÚA, que se celebrará o sábado, 4 de agosto de 2018, a partires das 18:00 h. na Praza de Galicia de Vilagarcía de Arousa (caso de mal tempo, trasladaríase o acto poético á Pza. da Peixería da mesma cidade); pois ben, ese día poñerase en circulación o boletín nº 10.

De paseniño, poderemos ir lendo aquí o boletín, outro medio de expresión do colectivo da Mesa das Verbas.

lunes, 11 de junio de 2018

Meu segundo premio no I Concurso Literario Letras Galegas



Nese mencionado Concurso, organizado polo Centro Comercial Arousa e a Mesa das Verbas, o traballo que ofrezo nesta entrada levou o 2º premio:


BUCLE NO LABIRINTO

Sentados na ponte pequena, preto da fermosa fervenza e dos antigos muíños, mollando os nosos pes no río saudoso, que se perde nas brétemas do espazo e do tempo... eu co avó a soñar coas estrelas e cos mundos ignotos poboados de verbas e maxestosas bolboretas.

-        -   Avó colleranos aquí a noite?
-        - Ti es aurora; eu lusco e fusco, a noite moura virá.
-        -   E veremos o campo de estrelas que vai cara o norte?
-        -   Así será, ti verás durante lúas e lúas ese campo, eu axiña ficarei nel.
-        -   Nese campo haberá años e ovellas?
-        -   E haberá, irán pastar nas leiras de algodón que ti verás. Nos recunchos escuros estarei eu.
-        -   Non digas iso avó que me pos triste, poderei eu levarte a luz?
-        -   Ti es a luz, albíscase nos teus ollos.
-        -  E pasearemos ti e máis eu por alí?
-        -  Sempre que me nomees e me lembres eu estarei en ti.
-        - Entón, avó, sempre, sempre direi o teu nome, berrareilles aos ameneiros e aos bidueiros como te chamas, non si?
-         - E o murmurio das súas follas, levado polo vento xunguirán as nosas voces, eu desde alá.
-         -  Avó porque agora me sinto tan triste?
-        -  Cala, cala... non me fagas chorar e deitar as bágoas secas dos meus vellos ollos. Aquí, no río está o noso lugar por sempre. As ninfas ancho lembrar.
-        -  Avó dille ás ninfas que non se esquezan diso, por favor!
-        -   Cala, cala... que non o esquecerán...
                                                                                            ... ... ...
O avó colle da man ao seu netiño (e lémbrase da pasada e lonxana conversa co seu avó xa ido). Venus comezaba a despuntar no ceo e cara a estrela Polar o campo de estrelas comezaba a brillar... camiñaban de paseniño a carón do río, que deitaba mansamente as súas augas cara o mar, que estaba ao lonxe, ben lonxe... O neto a soñar co seu ledo parolar, o avó coa tristura nos seus ollos, en silencio, sabedor de que axiña deixarán de alumear. Pasa o río como a vida para as súas augas finar no mar e así a roda da vida, roda que roda sen parar.
                                                                               
                                Xermán Manuel Torres





domingo, 20 de mayo de 2018

RICARDO URIOSTE MESANA

(+ Vilagarcía de Arousa, 16/09/1947 )
Noutro tempo dinamizador cultural de Vilagarcía. Home agudo, simpático, mordaz, uraño. Unha personaxe curiosa e atractiva da nosa historia local.


Imaxe de D. Ricardo conservada no Liceo Casino de Vilagarcía de Arousa




Formaba un famoso trío, cuxos pertencentes recoñecíanse a si mesmos como os “hermanos claraboya”, autores de divertidísimos “apropósitos” e de tantas iniciativas artísticas, cómicas e barulleiras. Cantos sorrisos e bos momentos fixeron pasar aos nosos avós e aos nosos pais (aínda mozos e nenos). Estes tres famosos elementos da vida cultural da Vilagarcía do primeiro terzo do século XX, non eran outros que Ricardo Urioste Mesana, Manolo Rey Posse e Juan Buhigas Olavarrieta.

Ricardo Urioste Mesana, funcionario do Concello de Vilagarcía de Arousa e do Consulado do Reino Unido na capital arousá, era quen de dirixir a orquestra e o coro, tocaba e ensinaba o piano, ademais doutros instrumentos, exercía tamén de director de escena,... en fin, un artista total, dirixiu o cadro artístico do Recreo Liceo da capital arousá. Un home inspirado, con grande creatividade e un extraordinario sentido do humor, que non lle faltou nunca. Era o del un humor satírico e burlesco.
É mágoa que fora un home de obra inédita, un home de acción, de obras para o momento, encadraría hoxe como un artista de “perfomances”. Quédanos a publicación do periódico El Cacahuete, da súa propiedade e autoría, consérvanse algúns exemplares no Fondo Local da Biblioteca Municipal Rosalía de Castro da nosa cidade, en concreto tres: o núm. 1 (18/04/1907), o núm. 4 (12/05/1907), e o núm. 5 (19/051907)
Transcribimos algún fragmento de poemas e ideas literarias de Urioste, que circula nun documento fotocopiado, que nos facilitou Alfonso Saavedra Lourido:

Ao seu médico de cabeceira:

“En el lecho de dolor a 19 de Carnestolendas de 1921
A mi doctor en cápite
D. Valentín Viqueira
                Villagarcía
Mi amigo Don Valentín;
Apenas me di la untura
Con la pomada de cinc
Ya se me inició la cura”.

      ============

HOTEL CARBALLINÉS
         Reservado Nº 3
              MENÚ
Consomé a la col grelé
Laconade a la chauchadé
Pixote puré a la futuré
    ______________
Filloes a la Luguess
Otres dessets variés
      ____________
            VINS
Chateau Rivieri
Café – Malté”

E rematamos coas seguintes simpáticas expresións de Urioste no El Cacahuete (1907):


"Hállase enfermo el ministro de la Guerra general Loño. / ¡Loño con la noticia!". (Núm. 1).

E na sección de Anuncios do mesmo número:

"¡OJO! ¡OJO! ¡OJO!  /  ¡LA MEJOR LECHE! / En la redacción de EL CACAHUETE informarán. / NO CONFUNDIRSE".

"P.P. con D. / Afeita, rasura, corta y riza a tenacilla toda clase de pelos. / NO CONFUNDIRSE / NO REPARA EN SITIOS".


BIBLIOGRAFÍA:


  • Mercedes Castro Nogueira, Guía do Fondo Local da Biblioteca Pública Municipal de Vilagarcía de Arousa (Pontevedra: Concellería de Cultura, Concello de Vilagarcía de Arousa, 2000), 18. 
  • Xosé Núñez Búa, Revoeira (Montevideo: Patronato da Cultura Galega: 1971), 35-36; 166.
  •  Ricardo Urioste Mesana, El Cacahuete (1907).
  •  Ricardo Urioste Mesana, Poemas Satíricos (material fotocopiado e sen data facilitado por Alfonso Saavedra Lourido).
  •  Xosé Lois Vila Fariña et Víctor Viana Martínez, Diccionario Biográfico de la Comarca de O Salnés (Vigo: Deputación Provincial de Pontevedra: 2001), 293.


WEBGRAFÍA:

sábado, 5 de mayo de 2018

LXXXII MESA DAS VERBAS - ESPECIAL LETRAS GALEGAS



Será unha edición especial no Día das Letras Galegas do 2018, dedicado a María Victoria Moreno, no que se procederá a entrega de premios do I CONCURSO LITERARIO LETRAS GALEGAS e contaremos ademáis coa colaboración musical de Xosé Duarte Rañó. Os premiados no concurso lerán os seus traballos.

Vinde ceibar ao ár de Arousa versos e verbas!!!

domingo, 22 de abril de 2018

I CONCURSO LITERARIO LETRAS GALEGAS - 18





Reunido o xurado o mércores, 18/04/2018    18:00 h, baixo a presidencia de Enrique Brumbéck e integrado ademais por Andrea Fernández, Ramón Torrado e Luís González, despois das súas deliberacións, emitiron o seguinte fallo:

1º PREMIO:   Cristian Díaz Araújo, por "Esquecinme"

2º PREMIO:   Xermán Manuel Torres, por "Bucle no labirinto"

3º PREMIO:   Augusto Guedes, por "Miño"

O xurado tamén decidiu establecer un accésit para Alejandro Guanella, por "Vibracións"

A entrega de premios terá lugar o xoves, 17 de maio de 2018, Día das Letras Galegas, ás 20:00 h. na sala de xuntanzas, no 3º andar do Centro Comercial Arousa de Vilagarcía, nunha edición especial, a LXXXII Mesa das Verbas.

Parabéns para os máis de 70 participantes e noraboa a todos os premiados.


miércoles, 18 de abril de 2018

A UNHA "EUGENIA DE MONTIJO"



Esplendorosa cor, vida
dunha "Eugenia de Montijo",
ledicia en vermello,
plenitude de camelia;
un segundo de carmesí,
instante cromático paralizado,
amor no meu corazón,
instantánea sensación
de xenerosidade natural.

---

Na sinxeleza das cousas,
como nunha flor,
agóchase a plenitude da vida.

martes, 10 de abril de 2018

O tío Manolito na lembranza




Xogo de verbas para o meu tío Manolito

Están tristes os xiríns,
xa non cantan os merlos
vaise a ledicia polo río,
foise o tío Manolito ao alén.

Leváronse os seus sorrisos,
anda de estrela en estrela
buscando nos niños os ovos
de novas e siderais aves.

Desde alá verá a Galicia,
a súa amada terriña,
desexando máis xustiza
e máis ledicia para todos.

Chouta ledo meu querido tío
desde planeta en planeta
que interesantes documentais ves,
que a viaxe sexa para ti feliz.

Os teus lembrarante por sempre,
a Puca triste sen ti
envíache seu mellor ladrido.
Túa terra caldense nota túa ausencia.

Voa libre polo espazo
nos nosos corazóns repousas,
tempo de paz e de estrelas,
es capitán do tempo inabarcable.

                      Xermán Manuel Torres

sábado, 24 de marzo de 2018

MEDULIO - BOLETÍN NÚM 2 DA MESA DAS VERBAS

Hoxe imos incluir o Boletín da Mesa das Verbas núm. 2, está a piques xa de aparecer impreso o nº 7, que se poñerá á venda na próxima edición da Mesa, o vindeiro sábado, 28 de abril. Grazas á venda deste humilde boletín entre os asíduos da Mesa das Verbas puidemos recadar os cartos que reverten nos premios aos literatos que participen no I CONCURSO LITERARIO LETRAS GALEGAS, organizado entre o Centro Comercial Arousa e o colectivo da Mesa das Verbas. Tamén este boletín é un órgano de expresión libre para os participantes na experiencia da Mesa das Verbas, aos que desde aquí lle damos as gracias por manter viva a creación de versos e verbas, que ceibamos ao ar de Arousa.










jueves, 15 de marzo de 2018

I CONCURSO LITERARIO LETRAS GALEGAS

Imaxe de Noé Parga (Faro de Vigo)

Imaxe do Diario de Arousa


I CONCURSO LITERARIO LETRAS GALEGAS / 18
CONVOCADO E ORGANIZADO POLA MESA DAS VERBAS E O CENTRO COMERCIAL AROUSA

1.- Convócase este I CONCURSO LITERARIO LETRAS GALEGAS / 18, idea e organización da Mesa das Verbas e do Centro Comercial Arousa co fin de promover e promocionar a creación literaria en lingua galega.
2.- Poderá participar neste concurso calquera persoa que o desexe que necesariamente acepta as presentes bases, propostas polas entidades colaboradoras, así como tamén acepta todas as decisións do xurado (que será elixido e conformado no seu día e oportunamente) e que terá a capacidade de dirimir e interpretar todo o concernente a este concurso e as súas decisións serán inapelables.
3.- Cada persoa poderá presentar un máximo de tres obras, que poderán pertencer a calquera xénero e estilo literario. A obra terá que estar escrita en idioma galego, ser orixinal e inédita, de tema libre. Non podendo ser coñecida nin premiada en calquera outro certame.
4.- A extensión máxima de cada obra será dun folio por unha soa cara. No reverso do folio figurará un número de teléfono de contacto. O folio non poderá conter ningún sinal de identificación, tan só pola parte de atrás figurará o teléfono de contacto.
5.- O prazo de entrega será ata o 17/04/2018 (inclusive). As obras serán depositadas nas urnas que se colocarán ao efecto nas dependencias do Centro Comercial Arousa.
6.- Os premios non poderán declararse desertos.
7.- A entrega de premios terá lugar o xoves, 17 de maio de 2018, Día das Letras Galegas, nunha edición especial da Mesa das Verbas, a partires das 20:00 h. na sala de xuntanzas, no 3º andar do Centro Comercial Arousa de Vilagarcía de Arousa.
8.- Os premios serán os seguintes:
- 1º PREMIO: 90 €, un vale de compra do Centro Comercial Arousa por valor de 50 €, e diploma.
- 2º PREMIO: 40 €, un vale de compra do Centro Comercial Arousa por valor de 40 €, e diploma.
- 3º PREMIO: 30 €, un vale de compra do Centro Comercial Arousa por valor de 20 €, e diploma.

9.- Os autores ceden todos os seus dereitos sobre as obras, durante o prazo dun ano a partires da data da entrega de premios, por se as entidades convocantes tiveran a oportunidade da publicación das obras premiadas. Transcorrido ese ano, reverterían de novo nos seus autores.

10.- As obras non premiadas poderán retirarse ata o 17/06/2018, acreditando debidamente ser a autora ou autor, despois desa data serán destruídas.

11.- A participación neste concurso implica a total e plena aceptación destas bases.


Vilagarcía de Arousa, 17 de marzo de 2018

sábado, 10 de marzo de 2018

UN EDUCADOR E O SEU AMIGO ENTRE FLORES

Xosé Filgueira Valverde gozaba coa beleza, coa bondade e coa Natureza


(Imaxe do despacho particular de Filgueira Valverde, flores e moreas de libros. Arquivo Gráfico do Museo de Pontevedra)

Xosé Filgueira Valverde (Pontevedra, 1906-1996) estivo sempre moi interesado no traballo interdisciplinar, non era estraño, xa que como un dos máximos representantes do Seminario de Estudos Galegos (1923-1936), defendía e propiciaba o traballo científico e intelectual “inter-áreas”, tal como promovía aquela lembrada e insuperable institución galega.
Filgueira Valverde estivo tamén moi relacionado coa Misión Biolóxica de Galicia (1921), instalada na cidade de Pontevedra (1927), despois do seu fugaz paso pola Escola de Veterinaria cando se atopaba instalada na cidade de Santiago de Compostela (1921-1926).  Filgueira fora nomeado vocal do Padroado da Misión Biolóxica en 1948. Desde a chegada de Antonio Odriozola (1911-1987) a Pontevedra en 1964, axiña estableceuse unha súa mutua amizade, o bibliotecario da Misión Biolóxica era o home que máis sabía sobre camelias, bibliografía, discografía e musicoloxía. D. Antonio pasaba polo Museo de Pontevedra (1927; 1929) puntualmente sobre o mediodía. Entre Filgueira e el sempre había un intercambio de saberes, sempre a falar de libros, flores e discos; afeccións comúns moi queridas, tamén conversaban sobre o grande Ramón María del Valle-Inclán (1866-1936). Nunha palabra, os dous namorados da beleza.
Filgueira Valverde, como o educador que era, imprimía seu afán didáctico a todos os seus actos, é un factor común, educar dentro e fóra da cátedra.
E como hoxe queremos darlle o protagonismo que se merece á camelia, subliñar que Filgueira Valverde promoveu e sempre deu o seu apoio o Certame Concurso Internacional da Camelia, cuxa primeira edición foi na cidade de Pontevedra no ano 1965, certame que vai rotando na súa celebración entre as cidades de Pontevedra, Vigo, e Vilagarcía. Precisamente, este ano a quenda da súa celebración correspóndelle a Vilagarcía, a cidade arousá organizará a LIV edición os días 10 e 11 de marzo.
Ese gusto polas flores compróbase no feito de que Filgueira Valverde tiña sempre un búcaro con flores no seu despacho. E na súa casa de Arcebispo Malvar, 49, abundaban plantas e flores a carón dos libros, moreas de libros. E entre as flores, unhas das súas preferidas, as camelias. As flores de orixe oriental, que viñeron de alén mar para quedarse. E xa ben aclimatadas nas nosas Rías Baixas, poboan xardíns públicos e privados, como os fermosos xardíns de tantos dos nosos magníficos pazos, como os de Rubiáns, Golpelleira, de Oca, de Castrelos... e como non? nas instalacións do antigo pazo do Arcebispo Malvar que ocupa a Misión Biolóxica de Galicia, felizmente asentada e consolidada en Pontevedra.
É tempo de camelias, no alén Odriozola e Filgueira han estar nun longo e inacabable parolar, quizais co marqués de Bradomín e as súas sonatas; é fácil maxinar do que falarán...

                                                            Xermán Manuel Torres


jueves, 15 de febrero de 2018

MESA DAS VERBAS E CONCURSO DE CARTAS DE AMOR



O próximo sábado, día 17, ás 20:00 h. teremos a LXXIX MESA DAS VERBAS na sala de xuntanzas do Centro Comercial Arousa. Nesta Mesa daranse a coñecer as tres cartas de amor en verso ou en prosa premiadas no Concurso, patrocinado polo Centro Comercial Arousa e organizado en colaboración coa Mesa das Verbas. Ese mesmo día, xunto ao recital poético, procederase á lectura das tres cartas premiadas.

Vinde ceibar connosco versos e verbas ao ar de Arousa. Mil primaveras para os versos e para as verbas.

Se fas plans para un ano, planta arroz. Se fas plans para dez anos, planta árbores. Se fas plans para cen anos, instrúe ao pobo. (Proverbio).


Despois de constituído o xurado o 15/02/2018   18:00, formado por Luis González de la Ballina, Enrique Brumbéck, Xosé Ramón Quintáns, Ramón Torrado, Luis González e Xermán Manuel Torres, tras a lectura e análise detida das 30 cartas de amor presentadas a concurso, o xurado emitiu sobre as 19:25 h. do día sinalado o seguinte fallo:

Conceder os tres premios dotados cun vale de 50 €, otorgados polo Centro Comercial Arousa, ás seguintes cartas:

- A MI AMOR de Tere Briones Berride

- QUISIERA de María de los Ángeles Conde Cubreiro

- TÚ ERES MI VERDAD de Marisa Jamardo Jueguen

E o xurado toma o acordo por unanimidade otorgar un ACCÉSIT (vale de 30 €) a un participante, que se sospeitaba era de menor idade e que compuso unha carta moi tenra e moi bonita. (Ao chamar polo tlfno. que tiña á carta ao dorso -este era o único medio de identificación-, comprobamos que efectivamente tratábase dun neno de doce anos-):

- QUERIDA JULIETA de Alexis BuezasTouriño

Damos os parabéns e a noraboa a todos os premiados e agradecemos a todos os participantes a súa colaboración. (Realmente, había traballos moi bos, e sobre certas decisións do xurado este doulle voltas e as análises correspondentes antes de adoptar a decisión final).

A MESA DAS VERBAS congratúlase e agradece esta estreita colaboración co CENTRO COMERCIAL DE AROUSA e polo ben dos versos e das verbas agardamos seguir contando con tan "gran amizade".

Finalmente, invitamos a todos os que o desexen participen na LXXIX MESA DAS VERBAS, o sábado 17, a partires das 20:00 h. na sala de xuntas no terceiro andar do CENTRO COMERCIAL AROUSA.

domingo, 21 de enero de 2018

7 ANOS DE MESA DAS VERBAS

Tal día coma hoxe fai sete anos nacía no Liceo Casino de Vilagarcía de Arousa a experiencia poética Mesa das Verbas, trátanse duns recitais poéticos mensuais abertos á participación de todo aquel que o desexe. Levaremos LXXVIII edicións seguidas; é dicir, setenta e oito meses seguidos ceibando versos ao ar de Arousa e facendo amizades ao carón quente de poemas compartidos, sentidos e vividos. Nada máis simple e maís complexo que compartir poemas nun marco de amizade e liberdade. Cada quen pode expresar poeticamente o que queira e responsabilízase e comprométese coas súas verbas.

Nesta segunda etapa, contamos coa colaboración do Concello de Vilagarcía de Arousa e en moitas ocasións coa axuda de Deputación Provincial de Pontevedra, así como tamén do Centro Comercial Arousa, na magnífica persoa do seu director, Luís González de la Ballina González.

Felicidades e noraboa a todos os amantes da poesía que teñen participado, seus nomes foron citados e serán tantas veces en entradas deste blog. Sen esquecer aos amigos do Grupo Poético de Vigo, chamado Brétema, que estiveron aí desde o primeiro momento.

Algúns queridos amigos xa partiron na nave que nunca ha de volver, como Manuel Olveira, María Palacios, Gonzalo Bouza Brey, Xosé Lois Vila Fariña (a quen lembraremos especialmente o próximo sábado), partiron pero queda o eco dos seus versos, das súas verbas, que por sempre soarán neste querido ar de Arousa.

Amigas e amigos temos Verbas o próximo sábado ás 18:00 h., na Sala de Conferencias do Auditorio Municipal de Vilagarcía de Arousa, agardámosvos alí.

ACOMPAÑAMENTO MUSICAL DO CORO VOCES AMIGAS DE VILAGARCÍA




Compartiron connosco a sesión poético-musical as estupendas compoñentes do coro Voces Amigas, maxistralmente dirixido por Tamara Casás, ofrecéronnos nove magníficas cancións do seu repertorio, coas que pudemos viaxar por distintos países da querida Hispanoamérica e aterrar na nosa amada Galicia. Viaxamos coas cancións e cos versos.


Nesta oportunidade, na que lembramos nas verbas e nos versos ao noso querido amigo Xosé Lois Vila Fariña, ceibamos os nosos versos ao ar de Arousa:

Tito Porto
Antonio Quiñoy
Sylvie Rico
Isaura Lago
Enrique Brumbéck
Ramón Torrado
Jean Carbalho
Isabel Peleteiro
Xosé Ramón Quintáns
Carme Darriba
Augusto Guedes
Alejandro Guanella
Manuel Lage
Xermán Manuel Torres






A LXXIX edición da Mesa das Verbas terá lugar o sábado, 17 de febreiro, ás 20:00 h. na Sala de Xuntanzas do 3º andar do Centro Comercial Arousa, co gallo de San Valentín, onde o amor será protagonista; pero xa falaremos disto. Ata outra millorada!

martes, 16 de enero de 2018

FILGUEIRA, PREGOEIRO (IV)



A faceta de pregoeiro en Xosé Filgueira Valverde

(Recollida no Catálogo (1996) de Mª Xesús Fortes Alén e nos Adrais de Filgueira Valverde)


       2.563 – Pastores de Galicia. Pregón da Campaña “Paz en la Tierra”. 21-XII-1967. (C. 499). P. 115.
       2.624 – Pregón da Campaña “Paz en la Tierra”. Inauguración da restauración da Sala do Capítulo do Convento de San Francisco. Pontevedra.23-XII-1970. (C. 544). P. 117.
       2.767 – Pregón da Festa da Muiñeira. Pontevedra, 1-VI-1974 – 122.
       2.768 – Pregón da Festa do Salmón. A Estrada, 2-VI-1974. – P. 122.
       2.940 – Pregón do Albariño. Cambados, 7-VIII-1977. P. 127.
       3.298 – Pregón do “Nadal Galego”. Centro Cultural de “Belén Electrónico”. Begonte, 18-XII-1982. (C. 999). P. 137.
       3.454 – Pregón da Festa da Muiñeira. Pazo de Raxoi. Santiago de Compostela, 25-V-1984. (C. 1067). P. 142.
       3.476 – Pregón para as Festas de Cangas. Concello de Cangas do Morrazo, 25-VIII-1984. P. 142.
       3.844 – Pregón e Ofrenda das Festas de San Roque. Vilagarcía de Arousa, 13-VIII-1988. (C. 1.223). P. 153.
       3.996 – Pregón de Semana Santa. Colexiata. A Coruña, 31-III-1990. (C. 1.296). P. 157.
       4.482 – Pregón da Feira do Libro. Pontevedra, 12-VIII-1995. (C. 1.579). P. 171.



PREGÓN NOS ADRAIS


       “Pregón para as festas de Cangas” en Quinto Adral (1989) 57; 223-225.
       “Pregón para unha Semana Santa de Viveiro, 1978” en Octavo Adral (1994) 28; 171-178.
       “Pregón para unhas festas do Apóstolo” en Terceiro Adral (1984) 22; 136-142.


REFERENCIAS A PREGÓN


       11 no Catálogo de Mª Xesús Fortes Alén (1996)
       3 nos Adrais (1984, 1989, 1994).


Deste xeito rematamos as entradas referidas á faceta de pregoeiro de Xosé Fernando Filgueira Valverde e a lembranza ao seu pregón das Festas de San Roque de Vilagarcía de Arousa en agosto de 1988.