LEMBRANDO A FILGUEIRA VALVERDE NESTE ANO 2023

 Antes de que finalice este significativo ano 2023, ano do Centenario do Seminario de Estudos Galegos (1923-1936), desexo lembrar a Xosé Filgueira Valverde (1906-1996), un dos máis destacados e laboriosos seminaristas.

Xosé Filgueira Valverde, in memoriam

 Xermán Torres

Tamén ofrece abondosas referencias sobre Filgueira Valverde o seguinte vídeo, Filgueira debería ser obxecto de máis dedicación por parte dos estudosos e dos amantes da cultura e da lingua galegas. Desfrutádeo, para iso o rescato, pois é así mesmo de 2015

BO NADAL E FELIZ ANINOVO-2024

 

I CONGRESO DE CIDADES DOS MUCHACHOS, 12-14-DECEMBRO-2023

 

Foi unha satisfacción poder asistir e participar en liña a este I Congreso das Cidades dos Muchachos do Mundo, desde Estados Unidos a BOYS TOWN, fundada polo padre Flanagan en 1917, desde a BENPOSTA DE COLOMBIA, fundada nos anos 60 do pasado século, despois dunha visita do Circo dos Muchachos do padre Silva, quen fundara en 1957 a BENPOSTA galega en Ourense e finalmente a CEMU DE LEGANÉS, fundada polo tío Alberto nos anos 70. Foi un pracer compartir as tardes dos días 12, 13, e 14 de decembro de 2023, desde as catro ás sete da tarde escoitando as experiencias dos muchachos, dos seus dirixintes e responsables e afondando na liña pedagóxica destas institucións, onde o neno é o centro e onde se pretende un ensino vital de democracia e liberdade e de respecto e tenrura cara os demais, mesmo dos máis necesitados. Como utopía vese necesario o goberno dos nenos na busca da construción dun mundo novo e mellor.

Animado a participar polo meu director de tese, o Dr. Xosé Manuel Cid Fernández, Decano da Facultade de Educación e Traballo Social do Campus de Ourense, da Universidade de Vigo e coordinador do meu Programa de Doutoramento en Ciencias da Educación e do Comportamento, quen coa súa aportación neste Congreso introduxo a idea da interxenaracionalidade nas Cidades dos Muchachos, e que a arquitectura das cidades debes estar adaptada aos nenos nas liñas propostas por Francesco Tonucci e o propio tío Alberto; pero, que hai que dar un paso máis, facer cidades máis humanas, amables e sostidas para os cidadáns de todas as idades. Esta proposta do Dr. Cid foi moi ben acollida no Congreso. As propostas pedagóxicas, didácticas e metodolóxicas da experiencia Cidades dos Muchachos son moi válidas e interesantes como paradigmas das accións educativas no noso maltreito mundo. A idea da docencia familiar interesoume moito e considéroa moi axeitada para a infancia e mocidade con problemas. A infancia con carencias afectivas e a infancia traumatizada tan necesitada de afecto e dunha correcta educación que lle motive a levar adiante un proceso vital que lles faga sentirse persoas realizadas e con protagonismo na sociedade para a súa promoción persoal, que lles axude a sentirse e a ser cidadáns útiles e aceptados para a construción dun mundo mellor, como arelaba o lembrado padre Silva.

Oxalá a Asociación Cultural Padre Silva, logre recuperar e rehabilitar a cidade de Benposta, a poucos kilómetros da cidade de Ourense.

Parabéns a todos os que fixeron posible este I Congreso de Cidades dos Muchachos do Mundo. Un mundo que queremos mellor, máis humano, máis amoroso, máis libre e máis xusto. Un lugar habitable e fermoso onde teñan cabida todos os seres humanos sen distincións nin discriminacións de ningún tipo. Poderémolo lograr!

VIDEO CLIPS

O SEMINARIO DE ESTUDOS GALEGOS E VILAGARCÍA DE AROUSA

 

O Seminario de Estudos Galegos (1923-1936), a institución científica e cultural privada máis importante da Galicia do século XX, vinculada á Universidade de Santiago e á intelectualidade galega daquel tempo, entre a que destacamos, á importante Xeración Nós (Losada Diéguez, Risco, Otero Pedrayo, Castelao, Cuevillas, Ramón Cabanillas, Xocas,...) e ao chamado grupo do Seminario, considerados os epígonos do grupo Nós (Fermín Bouza Brey, Xosé Filgueira Valverde, Lois Tobío, Martínez López, entre outros) realizou, nos seus escasos trece anos de existencia, un labor insuperable e digno da máxima loanza a prol da nosa lingua galega e da cultura da Nosa Terra.

Parabéns ao SEG, merecente da nosa lembranza agarimosa e chea de respecto, na celebración do seu centenario (1923-2023).

Por medio dos documentos de inicio desta entrada queremos lembrar a relación do SEG coa miña cidade natal, Vilagarcía de Arousa, xa que practicamente ningunha institución da cidade tivo en conta esta efeméride para honrar aos homes e as mulleres do SEG, agás a MESA DAS VERBAS, que celebrou unha das súas xeiras, en conmemoración de dito organismo, en Santiago de Compostela na sede do Instituto Padre Sarmiento de Estudos Galegos e da Secretaría Xeral de Política Lingüística, o pasado 13 de outubro de 2023, e o FAIADO DA MEMORIA, onde se presentou un libro da profesora Aurora Marco sobre a primeira muller seminarista. Salvo estas dúas entidades privadas vilagarcianas, ningún organismo oficial da capital arousá, ate o de agora, tivo iniciativa algunha e incluso se rexeitou algún ofrecemento para organizar algún acto con esta importante ocasión.

A MESA DAS VERBAS tamén dedicará o seu parladoiro do venres 22 de decembro, a partires das seis da tarde no bar-cafetería LA MARINA, sito na Alameda de Vilagarcía para difundir os dous documentos de inicio desta entrada, e render unha nova homenaxe ao SEG e destacar a súa relación con Vilagarcía de Arousa. Este parladoiro, como todos, está aberto a quen desexe participar e intervir. Vémonos, pois, o 22, ás seis da tarde na Marina.