Mostrando entradas con la etiqueta Asociación Cultural Sociedad Filarmónica de Vilagarcía. Mostrar todas las entradas
Mostrando entradas con la etiqueta Asociación Cultural Sociedad Filarmónica de Vilagarcía. Mostrar todas las entradas

domingo, 9 de octubre de 2016

SEGUNDO CONCERTO DA SOCIEDADE FILHARMÓNICA DE VILAGARCÍA-07-10-2016



Este pasado venres tivemos a gran fortuna de poder asistir ao segundo concerto da tempada da Sociedade Filharmónica de Vilagarcía de Arousa. Tivo lugar no Auditorio Municipal cunha boa presencia de socios e algún público acompañante, é un xeito de ir abrindo camiño cara a promoción da chamada música clásica. Estivo presente en representación municipal a Concelleira de Cultura, Sonia Outón, que se brindou a colaborar en todo momento. Pero, non obstante, botouse en falta a presencia do primeiro edil, quen tan pouco asistiu ao concerto inaugural. Penso que o señor alcalde debera apoiar máis a música e a cultura; pois en actos e actividades de carácter cultural brilla pola súa ausencia.

No apartado musical foi unha actuación brillante, chea de calidade, de sensibilidade, de dominio instrumental. Mayu demostrou porque é tan xustamente premiada, nas súas mans o violín (nesta oportunidade un Stradivarius de 1702) soa cunha perfección e riqueza de matices admirables, un sol de plenitude oriental, unha riqueza de vexetación nipona, unha flor de loto que embauca e deleita ao oínte. Moi ben acompañada por Suzana Bartal ao piano. Fusión perfecta de oriente e occidente, Xapón e Rumanía. A música non sabe de fronteiras, é un arte e unha linguaxe universal, ninguén e estranxeiro coa música, todos cidadáns do mundo. Mayu e Suzana, dúas excelsas realidades da música de hoxe, da música de sempre. Foi un enorme pracer e un privelexio gozar do seu arte, do seu excelente facer musical. Parabéns á Filharmonía, unha por nacer na nosa cidade e outra por brindarnos a oportunidade de poder deleitarnos con concertos de tanta calidade. Longa vida á Sociedade Filharmónica de Vilagarcía de Arousa, da que me honro en ser socio fundador e o seu actual tesoureiro, na directiva presidida por Xosé Luis Sanz, gran amante e executante da música, tendo por Vicepresidente ao noso amigo e compositor Elixio Vila, a Juan Antonio Nieto, un gran melómano, como secretario, agardamos que esta idea se consolide e vaia a máis. Que Atenea e as Musas nos acompañen.

lunes, 6 de junio de 2016

CONCERTO INAUGURAL DA SOCIEDADE FILHARMÓNICA DE VILAGARCÍA




Vémonos neste concerto, o próximo venres ás 21:00 h., no Auditorio Municipal de Vilagarcía de Arousa.
Comeza a súa andaina a Sociedade Filharmónica de Vilagarcía de Arousa.

Longa vida! 

Realmente o concerto resultou magnífico, un éxito artístico. En canto ao respaldo do público, ben os socios, pero só se acadou media entrada o que foi unha mágoa porque este acontecemento musical ben merecía un cheo absoluto. A representación institucional tamén mellorable, debería ser do máximo nivel, quizais moita xente non é consciente do significado do propio concerto en si e do que supón a creación dunha Sociedade Filarmónica na nosa cidade. Desexo manifestar aquí a máxima gratitude polo respaldo coa súa presencia dos compañeiros da Filharmónica de Santiago de Compostela e de Ferrol. Da presencia de todos os que acompañaron o nacemento desta sociedade en Arousa, non nomeo a ninguén por mor de cometer o erro irreparable de omitir a alguén e xa o noso presidente, Xosé Luis Sanz Acosta, citou e agradeceu as representacións nas súas palabras iniciais.

En canto ao concerto e interpretación de Yeol Eum Son, a min inspiroume dúas verbas: Sensibilidade e paz. As dotes artísticas e o dominio da técnica lévannos a supoñer as longas horas de estudo e de traballo desta inconmensurable pianista, que xa está na élite mundial, pero que, sen dúbida, na mesma seguirá escalando postos. Dou mostras dunha grande expresividade, dunha grande forza, unha pianista que convence e que seduce ao espectador, ao oínte. Foi unha noite de beleza, unha noite de música, chegaron a Arousa por primeira vez e por primeira vez a España os rechouchíos dunha passarinha chegada de Oriente, de Corea en forma de notas musicais, percutidas nun piano que nos deleitou a todos coa música eterna, a música clásica; da que Yeol é unha mestra inspirada e tocada polas musas. Desexamos que a Filharmónica nos ofreza noites musicais magníficas como esta, foi un extraordinario comezo, que non decaia, e que a xente se decate que hai algo máis que fútbol e cervexas nas terrazas, pero esto é cuestión de educación, que tomen nota todo tipo de autoridades que nos gobernan.

Yeol Eum Son moi amable e delicada ofreceunos o seu autógrafo: